Wie's so geit, Zyt blibt nid stah, mängs Schöns geit düre, derfür chunnt ume Nöis! Wie Dir sicher aui scho ghört heit, het es bi üs ir letschte Zyt veiechli Änderige gä.. Üse Dirigänt, dr Res Mathys steit sit em Dezämber 2013 nümme i üsne Reihe.. Danke Res, für die schöne Stunge wo mir zäme hei erläbt! Mir hoffe, dass mir üs zwüschine glich öppe gseh. Aber mir hei fescht Fröid, äs geit witer! Dr Res Frank vo Kirchberg het sich bereit erklärt, dass är üs bis zu üsem Konzärt vom 11. u 12. April 2014 vorübergehend musikalisch duet leite. Mir si fescht froh da drüber! A dere Steu härzleche Dank a Res Frank! Är macht sini Sach mit üs guet u mir wei üses Müglechschte gäh! Wo's de isch drum gange, ob mir ou am Eidg. Jodlerfescht in Davos wei teilnäh, hets no veiechli gä z'prichte.. Jä wie mache mir das? Drum hei mir dr Res Frank gfragt, ob es ächt ihn würdi gluschte u är sich das chönnt vorsteue mit üs as Jodlerfescht z'ga?? Är het drufabe gseit, är wöu das mit sire Frou no bespräche. Juhui! Ä Wuche später het üs dr Res gseit, bi sonere einmalige Kulisse, wo das Eidgenössische sig, da müessi mir doch fasch chönne ga, är weu üs ou uf Davos begleite! Mir fröie üs fescht! Härzleche Dank Res!